فیفا نے پاکستان کی رکنیت معطل کردی

فیفا نے پاکستان کی رکنیت معطل کردی

زیورچ: فٹبال کی عالمی تنظیم فیفا نے پاکستان فٹبال فیڈریشن (پی ایف ایف) کی رکنیت معطل کرتے ہوئے اس کی ہر طرح کے بین الاقوامی مقابلوں میں شرکت پر پابندی عائد کردی۔

پاکستان ٹرائب ڈاٹ کام اسپورٹس ڈیسک کے مطابق فیفا کی ویب سائٹ پر جاری کردہ اعلامیے میں کہا گیا کہ گذشتہ روز (10 اکتوبر کو) فیفا کونسل کے بیورو کا اجلاس منعقد ہوا جس میں پی ایف ایف کی رکنیت معطل کرنے کا فیصلہ کیا گیا جسے فوری طور پر نافذ کردیا گیا۔

فیفا اعلامیے کے مطابق بیورو نے پی ایف ایف کے دفاتر اور ان کے اکاؤنٹس، عدالت کی جانب سے تقرر کردہ منتظم کے سپرد ہونے کی بنا پر پاکستان فٹبال فیڈریش کی رکنیت معطل کرنے کا فیصلہ کیا۔

اعلامیے میں کہا گیا ہے کہ فیفا ضوابط کی خلاف ورزی کرتے ہوئے پی ایف ایف کی جانب سے فیڈریشن کے معاملات آزادانہ طور پر چلانے بجائے کسی دوسرے فریق کو سپرد ہیں۔

فیفا اعلامیے کے مطابق پی ایف ایف کے اکاؤنٹس واپس فیڈریشن کے سپرد ہونے کی صورت میں معطلی کا فیصلہ ختم کرتے ہوئے عائد پابندی اٹھا لی جائے گی۔

فٹبال کی عالمی تنظیم کی جانب سے عائد معطلی کے بعد فیفا آئین کے آرٹیکل 13 کے مطابق پی ایف ایف تمام بین الاقوامی ممبر شپ سے بھی محروم ہوگیا ہے جبکہ اس کے ساتھ ساتھ پی ایف ایف کی کلب ٹیمیں اور اس کے نمائندگان بھی کسی طرح کے بین الاقوامی ایونٹس میں شرکت کے اہل نہیں ہوں گے۔

فیفا کی جانب سے عائد پابندی کی بعد پی ایف ایف اور اس کے عہدیداران مستقبل میں فیفا یا ایشین فٹبال کنفیڈریشن (اے ایف سی) کی جانب سے منعقدہ کسی بھی ترقیاتی پروگرام یا ٹریننگ کورس میں شرکت کے بھی اہل نہیں ہوں گے۔

اس کے علاوہ فیفا کے آرٹیکل 16 کی شق 3 کے مطابق فیفا ممبران کی دیگر ایسوسی ایشنز بھی معطلی کے دوران پی ایف ایف کے ساتھ کھیلوں کی سطح کا کوئی رابطہ نہیں رکھ سکتیں۔

یاد رہے کہ پاکستان میں فٹبال کے امور چلانے والا اداراہ پاکستان فٹبال فیڈریشن میں معاملات تذبذب کا شکار تھے جس کے بعد یہ خدشہ ظاہر کیا جارہا تھا کہ فٹبال کی عالمی تنظیم پی ایف ایف کی رکنیت معطل کر سکتی ہے۔

ویب ڈیسک

یہ پاکستان ٹرائب کا آفیشل ویب ڈیسک اکاؤنٹ ہے۔

Leave a Reply

Your email address will not be published. Required fields are marked *