ملالہ یوسفزئی پر بننے والی فلم گل مکئی کی شوٹنگ شروع ہوگئی

ملالہ یوسفزئی پر بننے والی فلم گل مکئی کی شوٹنگ شروع ہوگئی

ممئی: بالی وڈ میں امن کی نوبل انعام یافتہ اور پاکستان کی بیٹی ملالہ یوسفزئی پر بننے والی فلم گل مکئی کی شوٹنگ شروع ہوگئی۔

پاکستان ٹرائب ڈاٹ کام لائف اسٹائل ڈیسک کے مطابق پاکستان کے صوبے خیبر پختونخوا کے ضلع سوات سے تعلق رکھنے والی ملالہ نے 2009 میں سوات آپریشن کے دوران برطانوی میڈیا میں ڈائری لکھ کر سوات کی کشیدہ صورت حال کی منظر کشی کرکے عالمی شہرت حاصل کی تھی جس پر انہیں ستارہ جرات بھی دیا گیا۔

ملالہ پر 9 اکتوبر 2012 میں اسکول سے گھر واپسی پر قاتلانہ حملہ ہوا اور سر میں گولی لگنے کے نتیجے میں وہ شدید زخمی ہوگئی تھیں جنہیں علاج کے لیے بیرون ملک لے جایا گیا، حملے کی ذمہ داری طالبان نے قبول کی تھی۔

ملالہ یوسف زئی لڑکیوں کی تعلیم کے لیے دنیا بھر میں پہچانے جانے والا نام بن گیا ہے، دنیا بھر میں ملالہ کی بچیوں کی تعلیم کے حوالے سے کوششوں کو نہ صرف سراہا گیا ہے بلکہ انہیں اسی جدوجہد کے سلسلے میں امن کا نوبل انعام بھی دیا گیا۔

بھارتی فلم انڈسٹری میں بھی ملالہ یوسف زئی کی زندگی پر فلم بنائی جارہی ہے جس کی ہدایت کاری کے فرائض امجد خان سر انجام دے رہے ہیں۔

فلم گل مکئی میں ملالہ کا کردار ٹی وی اداکارہ ریم شیخ ادا کررہی ہیں جب کہ والدہ کے کردار میں اداکارہ دیویا دتا اور اتل کلکرنی اہم کردار میں نظر آئیں گے۔
فلم میں ملالہ یوسف زئی کی والدہ کا کردار کرنے والی اداکارہ دیویا دتا نے سماجی رابطے کی ویب سائٹ ٹوئٹر پر فلم گل مکئی کی شوٹنگ شروع ہونے کا اعلان کیا۔

ان کا اپنی ٹوئٹ میں کہنا تھا کہ فلم گل مکئی کی شوٹنگ شروع ہوگئی ہے اور فلم ملالہ کی زندگی پر مبنی ہے، فلم میں ملالہ کے روپ میں نظر آنے والی ننھی اداکارہ ریم شیخ بھی اپنے کردار میں ڈھلنے کے لیے خوب محنت کررہی ہیں اور گزشتہ دنوں فلم کے پوسٹر کی پہلی جھلک منظر عام پر آئی ہے ۔

فلم گل مکئی کی شوٹنگ گزشتہ سال شروع کی گئی تھی اور فلم کا کچھ حصہ بھارتی گجرات میں فلمایا گیا تھا لیکن ناگزیر وجوہات کی بنا پر فلم کی شوٹنگ روک دی گئی تھی۔

فلم کا نام گل مکئی ملالہ کے اس فرضی نام سے لیا گیا ہے جس سے وہ سوات کے حالات تحریر کرتی تھیں۔

 

ویب ڈیسک

یہ پاکستان ٹرائب کا آفیشل ویب ڈیسک اکاؤنٹ ہے۔

Leave a Reply

Your email address will not be published. Required fields are marked *